विश्वकप छनोटमा पुगेको क्रिकेट टोलीलाई बागमती सरकारले जनही एक लाख दिने 

हेटौंडा-विश्वकपको ग्लोबल क्वालिफायरमा स्थान बनाउन सफल राष्ट्रिय क्रिकेट टिमका प्रत्येक खेलाडीलाई बागमती प्रदेश सरकारले जनही एक लाख रुपैयाँ दिने घोषणा गरेको छ ।

बागमती प्रदेशका मुख्यमन्त्री शालिकराम जम्कट्टेलले प्रदेश सरकारको तर्फबाट शुक्रबार राष्ट्रका लागि खेल मार्फत योगदान दिने खेलाडिलाई जनही एक लाख रुपैयाँ दिने घोषणा गरेका हुन् ।

‘खेलाडीको सम्मान र हौसालाको लागि बागमती प्रदेश सरकारले राष्ट्रिय क्रिकेट टिमका प्रत्येक खेलाडीलाई जनही एक लाख दिने भएका छौं’, उनले भने । बागमती प्रदेशका खेलाडीहरु समेत सम्मिलित उक्त टिमलाई जितको लागि बधाई दिँदै मुख्यमन्त्री जम्कट्टेलले थप प्रगति र सफलताको लागि शुभकामना दिएका छन् । उनले उत्कृष्ट खेल प्रस्तुत गर्दै क्रिकेट खेलाडीले देशको शिर उच्च बनाएकाले प्रदेश सरकारले सम्मान स्वरुप खेलाडीलाई प्रोत्साहन गरिएको बताए ।

नेपालले बिहीबार घरेलु मैदान किर्तिपुरमा आईसीसी विश्वकप लिग-२ त्रिकोणात्मक ओडिआई सिरिज अन्तर्गत अन्तिम खेलमा यूएईलाई ९ रनले  पराजित गर्दै विश्वकपको ग्लोबल क्वालिफायरमा हराउँदै नेपाल विश्वकप छनोटमा स्थान बनाएको थियो ।